สญฺโญชนวิปฺปยุตฺตํ อสญฺโญชนิยํ กุสลํ ธมฺมํ ปฏิจฺจ สญฺโญชนวิปฺปยุตฺโต อสญฺโญชนิโย กุสโล ธมฺโม อุปฺปชฺชติ เหตุปจฺจยาฯ (1)

[43] เหตุยา ทฺเว, อารมฺมเณ ทฺเว…เป.… อวิคเต ทฺเว (สํขิตฺตํ)ฯ

(ยถา จูฬนฺตรทุเก โลกิยทุกสทิสํฯ สหชาตวาโรปิ…เป.… ปญฺหาวาโรปิ สพฺพตฺถ วิตฺถาเรตพฺพาฯ)

[44] สญฺโญชนวิปฺปยุตฺโต สญฺโญชนิโย อกุสโล ธมฺโม สญฺโญชนวิปฺปยุตฺตสฺส สญฺโญชนิยสฺส อกุสลสฺส ธมฺมสฺส อารมฺมณปจฺจเยน ปจฺจโย (สํขิตฺตํ)ฯ

[45] อารมฺมเณ เอกํ (สพฺพตฺถ เอกํ, สํขิตฺตํ)ฯ

[46] สญฺโญชนวิปฺปยุตฺตํ สญฺโญชนิยํ อพฺยากตํ ธมฺมํ ปฏิจฺจ สญฺโญชนวิปฺปยุตฺโต สญฺโญชนิโย อพฺยากโต ธมฺโม อุปฺปชฺชติ เหตุปจฺจยาฯ (1)

สญฺโญชนวิปฺปยุตฺตํ อสญฺโญชนิยํ อพฺยากตํ ธมฺมํ ปฏิจฺจ สญฺโญชนวิปฺปยุตฺโต อสญฺโญชนิโย อพฺยากโต ธมฺโม อุปฺปชฺชติ เหตุปจฺจยาฯ สญฺโญชนวิปฺปยุตฺตํ อสญฺโญชนิยํ อพฺยากตํ ธมฺมํ ปฏิจฺจ สญฺโญชนวิปฺปยุตฺโต สญฺโญชนิโย อพฺยากโต ธมฺโม อุปฺปชฺชติ เหตุปจฺจยาฯ สญฺโญชนวิปฺปยุตฺตํ อสญฺโญชนิยํ อพฺยากตํ ธมฺมํ ปฏิจฺจ สญฺโญชนวิปฺปยุตฺโต สญฺโญชนิโย อพฺยากโต จ สญฺโญชนวิปฺปยุตฺโต อสญฺโญชนิโย อพฺยากโต จ ธมฺมา อุปฺปชฺชนฺติ เหตุปจฺจยาฯ (3)

สญฺโญชนวิปฺปยุตฺตํ สญฺโญชนิยํ อพฺยากตญฺจ สญฺโญชนวิปฺปยุตฺตํ อสญฺโญชนิยํ อพฺยากตญฺจ ธมฺมํ ปฏิจฺจ สญฺโญชนวิปฺปยุตฺโต สญฺโญชนิโย อพฺยากโต ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[47] เหตุยา ปญฺจ, อารมฺมเณ ทฺเว, อธิปติยา ปญฺจ…เป.… อาเสวเน เอกํ, กมฺเม ปญฺจ, วิปาเก ปญฺจ…เป.… อวิคเต ปญฺจ (สํขิตฺตํ)ฯ

นเหตุยา เอกํ, นอารมฺมเณ ตีณิ, นอธิปติยา ทฺเว, นปุเรชาเต จตฺตาริ, นปจฺฉาชาเต ปญฺจ , นอาเสวเน ปญฺจ, นกมฺเม เอกํ, นวิปาเก เอกํ, นวิปฺปยุตฺเต ทฺเว…เป.… โนวิคเต ตีณิ (สํขิตฺตํ)ฯ

(สหชาตวาโรปิ…เป.… สมฺปยุตฺตวาโรปิ ปฏิจฺจวารสทิสาฯ)

[48] สญฺโญชนวิปฺปยุตฺโต สญฺโญชนิโย อพฺยากโต ธมฺโม สญฺโญชนวิปฺปยุตฺตสฺส สญฺโญชนิยสฺส อพฺยากตสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ

[49] เหตุยา จตฺตาริ, อารมฺมเณ ตีณิ, อธิปติยา จตฺตาริ, อนนฺตเร จตฺตาริ…เป.… อวิคเต สตฺต (สํขิตฺตํ)ฯ

[50] นเหตุยา สตฺต, นอารมฺมเณ สตฺต (สํขิตฺตํ)ฯ

เหตุปจฺจยา นอารมฺมเณ จตฺตาริ (สํขิตฺตํ)ฯ

นเหตุปจฺจยา อารมฺมเณ ตีณิ (สํขิตฺตํ)ฯ

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํฯ)

สญฺโญชนโคจฺฉกกุสลตฺติกํ นิฏฺฐิตํฯ

26-1. คนฺถทุก-กุสลตฺติกํ

1-7. ปฏิจฺจวาราทิ

ปจฺจยจตุกฺกํ

[1] โนคนฺถํ กุสลํ ธมฺมํ ปฏิจฺจ โนคนฺโถ กุสโล ธมฺโม อุปฺปชฺชติ เหตุปจฺจยา (สํขิตฺตํ)ฯ

[2] เหตุยา เอกํ, อารมฺมเณ เอกํ…เป.… อวิคเต เอกํ (สํขิตฺตํ)ฯ

(สหชาตวาเรปิ …เป.… ปญฺหาวาเรปิ สพฺพตฺถ เอกํ)ฯ